原來比單戀更寂寞 (44)
我坐在一張四人座位，她說她負責買食物。
她買回了一堆肉丸、兩件西餅、一盤薯條、還有一份...凍蝦杯。
她還未坐定，我就跟她說：「我對蝦敏感，食左會出風癩。」
她神色慌張，內疚地說：「對唔住啊...我唔知啊，咁我去買過其他野，好唔好？」
我沒有怪她，歡容地說：「我食其他野夠喇...不過如果妳想食就要自己食曬成杯。」
她坐痊我對面，仍然關心地問：「你早啲同我講嘛，點解你會敏感既？」
我們又在如常的開始談起話來，我說：「其實我以前一直都幾鍾意食蝦，但係中學有次食Lunch食左碟蝦仁炒飯，無喇喇成身生曬風癩。」
她問：「咁之後就無再食過？」
我說：「自從個次就無再食過，連掂都唔敢再掂。」
她說：「但係只係一次渣喎...？」
我說：「係...就係衰一次就唔敢再試，就算之前幾多次無事都無用。」
她再把蝦杯推離我一點，再跟我分享：「中三個年上Chem堂，Cyrstalization個課要做實驗，我試過舐藍凡，因為覺得整出黎個晶體好靚。」
我問：「咁同我食蝦敏感有咩關係？之後妳條脷又敏感？舊野咩味架？」
她答：「無敏感，只係以後唔想再讀Chem...陣味好苦好苦...會令你驚覺原來世界上係有咁既味道...」
(註：讀者們千祈不要親身驗證。）
我吃著肉丸，她在剝蝦。
她似有千言萬語想吐出，我半專心的跟她談著。
她說：「其實我都有野唔鍾意食。」
我說：「妳係唔係想我估下？」
她說：「唔係，你當聽多一個關於我既故事。」
我說：「嗯，妳講喇...妳唔介意我食住聽嘛？」
她說：「唔介意，件事都係大約中六個時，未識初戀個男仔之前，我都識過一個男仔，係我好朋友既朋友。」
我說：「嘩...妳地唔係同一時間鍾意左佢啊？咁老套？」
她說：「比你講中...」
我說：「咁結果點啊？」
她說：「結果唔係重點，重點係個過程，我個時為左唔想輸比佢所以好落力咁，想自己睇落Silm啲...」
我說：「嗯？所以咩都唔食？」
她說：「唔係，食，不過早午晚三餐都係食西芹，因為消化西芹會燃燒更多既卡路里...」
我說：「咁好辛苦姐...」
她說：「都未算，我記得個時係中秋節，忍唔住口食左件月餅，啊，我記得個時係睇緊American Next Model，一睇完之後即刻入廁所扣喉...」
我說：「個男仔知唔知？最後佢揀左邊個？」
她說：「得你知...最後個男仔揀左我個好朋友...」
我說：「咁妳依家睇番有咩感覺？有冇後悔？」
她說：「我覺得好折墜...個時返學行樓梯都無力...咁樣負卡路里減肥，唔單止犧牲一時半刻食零食既享樂，而係犧牲自己既身體...」
我說：「甘妳仲會唔會咁？」
她說：「唔會，咁樣好唔Free...我唔想再甘樣鐘意一個人...」
我說：「如果我要妳係咁呢？」
她說：「我會對你好失望，咁樣既話你只係鍾意緊一啲我無既野，我想鍾意我既人係欣賞本身既我。」
我說：「哈...當然喇...我都係隨口講下...假設性問題黎...」
她說：「咁你會唔會嫌我第時變到好肥？」
我說：「唔會啊...都...都唔係...見到妳好耐姐...」
她說：「咩話？我miss 左...」
我說：「無啊無野，我話妳隻手食緊蝦唔好掂過黎我度！」
她說：「咁你可唔可以食龍蝦丸架？」
我說：「得...」
她說：「咁蝦子面呢？」
我說：「......」
她說：「咁蝦片呢？」
我說：「.........................」
Search